திருக்கோவில் பிரதேச அபிவிருத்திக் குழுக்கூட்டமானது திருக்கோவில் பிரதேச செயலாளர் த. கஜேந்திரனின் ஏற்பாட்டில் தேசிய மக்கள் சக்தியின் திகாமடுல்ல மாவட்ட பாராளுமன்ற உறுப்பினரும் பிரதேச அபிவிருத்திக் குழுத் தலைவருமான திரு. ஆதம்பாவாவின் தலைமையில் திருக்கோவில் பிரதேச செயலக ஒன்று கூடல் மண்டபத்தில் இடம்பெற்றது.
குறித்த நிகழ்வில் கடந்த அபிவிருத்திக் குழுக் கூட்டத்தில் எடுக்கப்பட்ட தீர்மானங்களுக்கு அமைவாக செயற்பாடுகள் இடம்பெற்றுள்ளதா என்பது பற்றி குறித்த தரப்பினர்களுடன் ஆராயப்பட்டத்துடன் தற்போது பிரதேசத்தில் காணப்படும் அபிவிருத்திகள் சமுக பிரச்சினைகள் பற்றியும் உரிய அதிகாரிகளுடன் கலந்துரையாடப்பட்டது. அத்துடன் புதிய தீர்மானங்களும் எடுக்கப்பட்டமையும் குறிப்பிடத்தக்கது.
இந்நிகழ்வில் திகாமடுல்ல மாவட்ட பாராளுமன்ற உறுப்பினர் ஜனா, அப்துல் வாஸித், திருக்கோவில் பிரதேச சபை தவிசாளர் சு. சசிகுமார், திருக்கோவில் பிரதேச செயலக உதவிச்செயலாளர், உதவித்திட்டமிடல் பணிப்பாளர், அம்பாறை மாவட்ட பாராளுமன்ற உறுப்பினர், திருக்கோவில் பிரதேச சபையின் செயலாளர், பிரதேச அபிவிருத்திக் குழுத் தலைவரின் செயலாளர்கள், திருக்கோவில் பிரதேசத்தில் உள்ள திணைக்களங்களின் தலைவர்கள், உறுப்பினர்கள், படையினர், கிராமசேவையாளர்கள், கிராம பொருளாதார அபிவிருத்தி உத்தியோத்தர்கள் மற்றும் விவசாய பிரதிநிதிகள் ஆகியோர் கலந்து கொண்டனர்.
ஆழ் கடல் மீனவர்களுக்கான எரிபொருள் தடையின்றி வழங்குவதற்கான நடவடிக்கை; காஞ்சிரன் குடா நெற்களஞ்சிய சாலையினை இயக்குவதற்கான வேலைத்திட்டங்களை முன்னெடுத்தல்; திருக்கோவில் பல்நோக்கு கூட்டுறவு சங்கத்தின் நெற்களஞ்சியசாலையினை பயன் படுத்துவதற்கான நடவடிக்கைகள்; புதிய வீதிகள் அபிவிருத்தி, வீதிகளில் மின்குமிழ்கள் பொருத்துவதற்கான நடவடிக்கை; பிரதேசத்தின் யானை வேலி அமைப்பதற்கான நடவடிக்கை; திருக்கோவில் ஆதாரவைத்திய சாலையின் அபிவிருத்திகள் தேவைகளை மேற்கொள்வதற்கான நடவடிக்கைகள்; சட்ட விரோத மதுபான விற்பனை நிலையங்கள், போதைப்பொருள் விற்பனைகள் போன்றவற்றுக்கான சட்ட நடவடிக்கைகள் மேற்கொள்ளல்; சட்டவிரோத மணல் அகழ்விற்கு எதிரான சட்ட நடவடிக்கை எடுத்தல், எல்ஆர்சி காணிகளுக்கு விரைவில் ஆவணப்பத்திரங்கள் வழங்கல்; கல்வி நடவடிக்கைகளுக்கு தேவையான நிதியினை பெற்று கொடுப்பதற்கான நடவடிக்கையை விரைவில் எடுத்தல் போன்ற தீர்மானங்கள் எடுக்கப்பட்டன.


