கையடக்கத் தொலைபேசிகளைத் திருடி வந்த இளைஞன் கைது

மட்டக்களப்பு போதனா வைத்தியசாலையில் சிகிச்சை பெற்று வரும் நோயாளிகள், தாதியர்கள் மற்றும் வைத்தியர்கள் உட்பட பலரின் கையடக்கத் தொலைபேசிகள் மற்றும் பணம் என்பவற்றைத் திருடி வந்த 23 வயதுடைய இளைஞன் ஒருவரையும் கையடக்கத் தொலைபேசி விற்பனை நிலைய உரிமையாளர் ஒருவர் உட்பட இருவரை நேற்று(13) இரவு ஏறாவூரில் வைத்து கைது செய்துள்ளதுடன் திருடப்பட்ட 18 கையடக்கத் தொலைபேசிகளை மீட்டுள்ளதாக மட்டு தலைமையக பொலிஸார் தெரிவித்தனர்;

 

இது பற்றி தெரியவருவதாவது,

 

மட்டு போதனா வைத்தியசாலையில் நோய்க்காகத் தங்கியிருந்து சிகிச்சை பெற்று வந்த ஒருவருக்கு உதவியாக இருந்த பெண் ஒருவரின் கைப்பையில் வைத்திருந்த கையடக்கத் தொலைபேசி மற்றும் 10 ஆயிரம் ரூபா பணத்துடன் கைப்பை திருடு போயுள்ளது தொடர்பாக கடந்த 2 தினங்களுக்கு முன்னர் மட்டு தலைமையகப் பொலிஸ் நிலையத்தில் முறைப்பாடு செய்திருந்தனர்.

 

இதனையடுத்து குறித்த திருட்டு தொடர்பாக சிறு குற்றத்தடுப்புப் பிரிவு பொலிஸ் பொறுப்பதிகாரி பொலிஸ் பரிசோதகர் பிரதீப் பெர்னார்ந்தே தலைமையிலான பொலிஸார் விசாரணைகளை மேற்கொண்டு வந்தனர்.

 

இந்த நிலையில் ஏறாவூர் பிரதான வீதியில் உள்ள கையடக்கத் தொலைபேசி விற்பனை நிலையம் ஒன்றில் இளைஞன் ஒருவர் 5 கையடக்கத் தொலைபேசிகளைக் கொண்டு சென்றூ அதன் இரகசிய எண் கொண்ட பூட்டை உடைத்துத் தருமாறு அந்த கடை உரிமையாளரிடம் வழங்கியுள்ளார்.

 

இது தொடர்பாக மாவட்ட புலனாய்வுப் பிரிவுக்குக் கிடைத்த தகவல் ஒன்றையடுத்து உடனடியாக சம்பவ தினமான நேற்று இரவு முற்றுகையிட்ட பொலிஸார் குறித்த இளைஞனைக் கைது செய்து விசாரித்த போது குறித்த தொலைபேசிகளை மட்டு போதனா வைத்தியசாலையில் திருடி உள்ளதாக தெரிய வந்துள்ளதையடுத்து கடை உரிமையாளர் உட்பட இருவரையும் கைது செய்ததுடன் திருடப்பட்ட 18 கையடக்கத் தொலைபேசிகள் மற்றும் கணணி போன்ற உபகரணங்களை மீட்டனர்.

 

இவ்வாறு கைது செய்தவர்களை மட்டு தலைமையகப் பொலிஸாரிடம் ஒப்படைக்கப்பட்டதையடுத்து ஏறாவூர் மிச் நகரைச் சேர்ந்த 23 வயதுடைய

குறித்த இளைஞன் கிழமையில் ஒரு நாள் வைத்தியசாலைக்குள் நுழைந்து வாட்களில் தங்கியிருக்கும் நோயாளர்கள் மலசல கூடம் செல்லும் போது அவர்களின் கையடக்கத் தொலைபேசி, பணம் மற்றும் நோயாளிகளுக்கு உதவியாக இருப்பவர்கள், வைத்தியர்கள், தாதியர்கள் உட்பட பலரின் கையடக்கத் தொலைபேசிகளைக் கடந்த ஒரு வருடத்திற்கு மேலாக திருடி வந்துள்ளதாகவும் அதை ஏறாவூரில் உள்ள கையடக்கத் தொலைபேசி விற்பனை மற்றும  திருத்தம் குறித்த கடையில் கொடுத்து கையடக்க தொலைபேசியின் இரகசிய எண் கொண்ட பூட்டை உடைத்த பின்னர் அதனை விற்பனை செய்து வந்துள்ளது பொலிஸாரின் ஆரம்பக்கட்ட விசாரணையில் தெரியவந்துள்ளது.

 

இதில் கைது செய்யப்பட்டவர்களை விசாரணையின் பின்னர் நீதிமன்றத்தில் ஆஜர்படுத்த நடவடிக்கை எடுக்கப்பட்டுள்ளதாக பொலிஸார் தெரிவித்தனர்.

Leave a Reply

Your email address will not be published. Required fields are marked *