கரடியனாறில் பிரதேச சபை உறுப்பினரின் வீடு தீ வைத்து எரிப்பு

மட்டக்களப்பு, கரடியனாறு பொலிஸ் பிரிவுக்குட்பட்ட உறுகாமம் பகுதியில் உள்ள இலங்கைத் தமிழ் அரசுக் கட்சியைச் சேர்ந்த பிரதேச சபை உறுப்பினர் ஒருவரின் வீடு நேற்று(19) இரவு தீ வைத்து எரிக்கப்பட்டுள்ளது.

 

இந்தச் சம்பவம் இரவு 11:00 மணியளவில், ஏறாவூர் பற்று செங்கலடிப் பிரதேச சபை உறுப்பினரான சி. சர்வநந்தனின் இல்லத்தில் இடம்பெற்றது.

 

வீட்டின் ஒரு பகுதி சேதமடைந்ததாகவும், வீட்டின் உள்ளே நிறுத்தி வைக்கப்பட்டிருந்த ஒரு மோட்டார் சைக்கிள் முற்றாக எரிந்து நாசமாகியுள்ளதாகவும் தெரிவிக்கப்படுகிறது. அத்துடன், வீட்டு உபயோகப் பொருட்கள், கதவுகள், ஜன்னல்கள் மற்றும் கூரையின் சில பகுதிகளும் சேதமடைந்துள்ளன.

 

சம்பவம் விபத்தினால் நடக்கவில்லை, மாறாக தீ வைக்கப்பட்ட செயல் என உறுப்பினர் சர்வநந்தன் குற்றம் சாட்டியுள்ளார். இதையடுத்து, வீட்டின் உரிமையாளரான சி. சிவானந்தன், கரடியனாறு பொலிஸ் நிலையத்தில் உத்தியோகபூர்வமாக முறைப்பாடு பதிவு செய்தார்.

 

சம்பவம் நடந்தபோது வீட்டில் யாரும் இருக்கவில்லை என்றும், சம்பவத்தைத் தொடர்ந்து உடனடியாக முறைப்பாடு தாக்கல் செய்யப்பட்டதாகவும் உறுப்பினர் தெரிவித்தார். மட்டக்களப்பு மாவட்ட குற்றப் புலனாய்வுப் பிரிவினரும், இலங்கை மின்சார சபையினரும் விசாரணைகளை ஆரம்பித்துள்ளனர்.

 

இதற்கிடையில், வாழைச்சேனை பிரதேச சபைத் தலைவர் சுதாகரன் மற்றும் ஏறாவூர் பற்று பிரதேச சபை உறுப்பினர் மற்றும் ஊடகவியலாளர் சி. நிலந்தனன் ஆகியோர் சேதங்களை பார்வையிட சம்பவ இடத்திற்கு விஜயம் செய்தனர்.

 

இந்தத் தீ வைப்புத் தாக்குதல் குறித்த பொலிஸ் விசாரணைகள் தொடர்ந்து நடைபெற்று வருகின்றன.

Leave a Reply

Your email address will not be published. Required fields are marked *