யாழ்ப்பாணம், வடமராட்சியில் அமைந்துள்ள வரலாற்றுச் சிறப்புமிக்க ஸ்ரீ வல்லிபுரம் ஆழ்வார் ஆலயத்தின் வருடாந்த மகோற்சவத் தேர்த் திருவிழா இன்று (25) பக்திபூர்வமாக நடைபெற்றது.
மகோற்சவத்தின் முக்கிய நிகழ்வான தேர்த் திருவிழா இன்று காலை 8 மணியளவில் ஆரம்பமானது.
இலங்கையின் பல பகுதிகளில் இருந்தும், வெளிநாடுகளில் இருந்தும் பல்லாயிரக்கணக்கான பக்தர்கள் தேர்த் திருவிழாவில் பங்கேற்பதற்காக வல்லிபுரத்தில் திரண்டனர்.
அரோகரா முழக்கங்கள் மற்றும் பக்திப் பாடல்கள் ஒலிக்க, விசேடமாக அலங்கரிக்கப்பட்ட திருத்தேரில் வல்லிபுரம் ஆழ்வார் எழுந்தருளி வீதியுலா வந்து பக்தர்களுக்கு அருள்பாலித்தார்.
இதன்போது, பக்தர்கள் அங்கப்பிரதிஷ்டை உள்ளிட்ட நேர்த்திக்கடன்களை நிறைவேற்றியதுடன், பல்வேறு காவடிகளைத் தாங்கியும் வழிபாடுகளில் ஈடுபட்டனர்.
பக்தர்களின் பாதுகாப்பு மற்றும் வசதிகளைக் கருத்திற்கொண்டு ஆலய நிர்வாகத்தினரும் தொண்டர் குழுவினரும் விசேட ஏற்பாடுகளை மேற்கொண்டிருந்தனர்.