யாழ்ப்பாண மாவட்டத்தின் நெடுந்தீவு உள்ளிட்ட கடல் கடந்த தீவகப் பகுதிகளில் பணியாற்றும் ஆசிரியர்களுக்கான கஷ்டப்பிரதேச கொடுப்பனவுகளை வழங்க நடவடிக்கை எடுக்காத வடமாகாண கல்வி அதிகாரிகளின் பொறுப்பற்ற செயற்பாடு குறித்து, மத்திய கல்வி அமைச்சின் செயலாளரிடம் முறைப்பாடு செய்யப்பட்டுள்ளது.
பாதிக்கப்பட்டுள்ள ஆசிரியர்களின் விபரங்கள் கடல் வழிப் பயணங்களை மேற்கொண்டு ஆபத்தான மற்றும் சவாலான சூழலில் பணியாற்றும் பின்வரும் பாடசாலைகளின் ஆசிரியர்கள் தற்போது கொடுப்பனவுகளை இழந்துள்ளனர்:
நெடுந்தீவு: 8 பாடசாலைகளைச் சேர்ந்த 92 ஆசிரியர்கள்
நயினாதீவு: 3 பாடசாலைகளைச் சேர்ந்த 46 ஆசிரியர்கள்
அனலைத்தீவு: 3 பாடசாலைகளைச் சேர்ந்த 23 ஆசிரியர்கள்.
எழுவைத்தீவு: 2 பாடசாலைகளைச் சேர்ந்த 13 ஆசிரியர்கள்.
தவறான வகைப்பாடும் அதிகாரிகளின் அலட்சியமும்
கல்வி அமைச்சின் 01/2024 (1) இலக்க பாடசாலை வகைப்பாட்டு சுற்றறிக்கையின் ஊடாக, இப்பாடசாலைகள் “கஷ்டப்பிரதேச” தரத்திலிருந்து நீக்கப்பட்டுள்ளன. இணைய வசதி, நீர் வசதி மற்றும் பேருந்து போக்குவரத்து போன்ற காரணிகளை அடிப்படையாகக் கொண்டே இந்த வகைப்பாடு செய்யப்பட்டுள்ளது.
எனினும், இப்பாடசாலைகளுக்குச் செல்வதற்கு அவசியமான “கடல் வழிப் பயணம்” என்ற மிக முக்கியமான காரணி முற்றிலும் புறக்கணிக்கப்பட்டுள்ளது. வட மாகாண கல்வி அதிகாரிகள் கல்வி அமைச்சுக்கு தரவுகளை வழங்கும்போது, தீவகப் பாடசாலைகளின் புவியியல் சார் இடர்பாடுகளைச் சரியாகச் சுட்டிக்காட்டத் தவறியதே இந்த நிலைக்குக் காரணம் என இலங்கை ஆசிரியர் சங்கம் சுட்டிக்காட்டியுள்ளது
“தாங்கள் செய்த தவறைச் சரி செய்யாமல், ஆசிரியர்களின் இடர்ப்பாட்டு கொடுப்பனவை வழங்காமல் இருப்பது வட மாகாண கல்வி அதிகாரிகளின் கடும் பொறுப்பற்ற செயலாகும்.” – ஜோசப் ஸ்ராலின்
முக்கிய கோரிக்கைகள்
மத்திய கல்வி அமைச்சின் செயலாளருக்கு அனுப்பப்பட்டுள்ள கடிதத்தில் பின்வரும் கோரிக்கைகள் முன்வைக்கப்பட்டுள்ளன:
மீளாய்வு: நாட்டிலேயே மிகவும் நெருக்கடியான சூழலில் அமைந்துள்ள தீவகப் பாடசாலைகளின் வகைப்பாட்டை உடனடியாக மறுபரிசீலனை செய்து, நிறுத்தி வைக்கப்பட்டுள்ள இடர்ப்பாட்டுக் கொடுப்பனவுகளை வழங்க வேண்டும்
நாடளாவிய ரீதியிலான பாதிப்பு: புதிய வகைப்பாட்டினால் ஏனைய மாவட்டங்களிலும் கொடுப்பனவுகளை இழந்த பாடசாலைகள் குறித்து முறையான விசாரணை நடத்தி தீர்வு காணப்பட வேண்டும்.
உயர்த்தப்பட்ட கொடுப்பனவு: 2026 ஆம் ஆண்டு வரவு செலவுத் திட்டத்தில் ஆசிரியர்களுக்கான இடர்ப்பாட்டுக் கொடுப்பனவு அதிகரிக்கப்பட்டுள்ள போதிலும், இன்னும் பழைய வீதங்களான (ரூ. 2500 மற்றும் ரூ. 1500) வழங்கப்பட்டு வருகின்றன. எனவே, வரவு செலவுத் திட்டத்தில் அறிவிக்கப்பட்ட புதிய அதிகரித்த கொடுப்பனவுகளை உடனடியாக அமுல்படுத்த வேண்டும்.
மிகவும் பின்தங்கிய சூழலில் அர்ப்பணிப்புடன் பணியாற்றும் ஆசிரியர்களின் உரிமைகளை உறுதிப்படுத்த கல்வி அமைச்சு விரைந்து நடவடிக்கை எடுக்க வேண்டுமென இக்கடிதத்தில் வலியுறுத்தப்பட்டுள்ளது.